Header Row

港式奶茶王 陳偉聰

酷男奶茶封王 致勝秘訣:直覺心情水溫


【本報訊】陳偉聰今年37歲,已有逾20年的冲奶茶經驗;他外表冷酷,問一句答一句,卻是冲奶茶高手。他昨日技壓一眾同業,在第一屆「金茶王大賽」奪得個人組「奶茶之王」美譽。風光背後,酷男茶王原來是一名失業人士,他在參加比賽期間慘遭解僱。茶王指冲奶茶全憑直覺,只要心情靚加上適當水溫,自然可以炮製出一杯香滑奶茶。他希望憑藉今次封王,贏得賞識,有朝一日向茶客再展冲奶茶秘技。記者:鄧愷欣、盧文烈、黃偉駿

奶茶可說是港人至愛,為了推廣港式奶茶這本土獨特文化,在首屆國際茶展上,舉行了由香 港咖啡紅茶協會主辦的第一屆「金茶王大賽」。是次比賽的個人組及公司組名單分別有17 個,早前已在每組選出6個名單,進入昨日的總決賽。

為參加賽事慘遭僱主解僱

一眾參賽者為了「冲杯靚茶」而施展渾身解數,焗茶、撞茶等每個步驟均絕不馬虎,務求調校出最香醇的港式奶茶,令現場瀰漫陣陣茶香。評審以茶香、茶色、溫度、濃厚度、滑度、茶味、奶味、茶奶味平衡、回味及整體喜愛程度作評審準則,結果個人組由陳偉聰奪得冠軍。陳偉聰透露,自己冲奶茶冲了20多年,曾經在多間冰室及茶餐廳任水吧,但奈何在報名參加今次賽事期間,突然慘吃無情雞遭僱主解僱,「唔知係唔係佢見我參加比賽,可能冇時間返工,所以炒咗我。」這名失業茶王外表冷酷,不愛說話,記者問一句,他就答一句,答案有時很玄。記者問茶王認為自己贏在甚麼地方,他淡淡然地說:「用個心,平常心。」他又謙稱,冲奶茶其實很簡單,「有水、有杯、有茶葉咪得囉。」茶王稱,冲奶茶最重要憑直覺,毋須太多技巧,「心情好嘅時候就滑一啲,心情唔好時就又嚡又澀。」要炮製出一杯香滑奶茶,大約需時20分鐘,「首先將茶葉放喺煲度焗一陣,逼出香味,之後倒三分之一壺 水去焗五分鐘,然後再換水就可以冲嚟飲。」

每年只飲兩杯免影響味蕾

茶王認為,炮製奶茶水溫介乎95至96度之間最為理想,「水溫太高,啲奶茶嚡啲;水溫太低,就會有臭青味。」選用的茶葉則要混雜幼葉及粗葉,「咁樣茶先夠香,顏色先夠靚。」陳偉聰曾為無數顧客冲製奶茶,但原來自己甚少飲奶茶,每年大約只飲一至兩杯,「飲得太多會影響味蕾,同對奶茶嘅感覺。」他表示,港式奶茶值得向國際推介,他今次參賽,只求「攞多啲經驗」,為日後搵食鋪路,希望贏得奶茶之王殊榮後,有僱主會賞識,日後再為 港人炮製靚茶。

評審:最重要是茶奶平衡

比賽評審之一的時裝設計師鄧達智表示,各參賽者調校的奶茶質素極高,「仲好味過平日去佢哋度飲嗰啲!」並指一杯好飲的奶茶,最重要是茶奶平衡,「奶味太重就唔係飲茶,奶太少就會唔夠滑,拿揑得準確係好困難。」他自言4、5歲開始愛上飲奶茶,閒時也會四處尋訪隱世奶茶。除了個人及公司組外,大會特設「專業推介組」,其中翠華餐廳獲最具特色風味獎,檀島咖啡店獲最具傳統風味獎,大排檔獲最具香港情懷大獎,奇興美食獲最專業冲製獎,太興燒味餐廳獲最具創意新意念獎,扒王之王則奪得最獨特口味獎。


隔牆有耳:向生收奶茶王做 o靚 2009年08月23日

一星期前喺首屆「金茶王大賽」奪得個人組「奶茶之王」嘅酷男陳偉聰,果然冲出彩虹,打散工嘅佢獲封奶茶王後引起唔少老細興趣,原來向華強已暗中出手,雙方一拍即合。奶茶王上星期四已到向生旗下澳門蘭桂坊酒店返工,向生仲佈置咗個「金牌奶茶王」專櫃畀佢打骰㖭!
月薪逾兩萬元

據講向生日日無奶茶不歡,上星期睇到奶茶王出爐消息即聯絡陳偉聰,向太陳明英同八方講,上星期三搵到陳偉聰,未試過佢杯茶已決定請佢,叫佢翌日買茶葉、冲茶架生即刻去澳門開工,月薪逾兩萬元,比做普通水吧高一大截,「佢自願返兩更,又話要養父母同個仔,所以畀高啲人工佢。」
向太話酒店嘅酒吧整咗個「金牌奶茶王」專櫃交畀陳偉聰負責,暫時免費供顧客品嚐,視乎反應稍後先定價。佢試過陳偉聰手勢,覺得並非浪得虛名,又坦言請奶茶王加盟有啲噱頭性質,「我都希望港式奶茶喺澳門發揚光大。」

身價驟升嘅陳偉聰噚日載譽歸來,出席飲食業為台灣天災籌款活動,豪擲一萬蚊買咗一杯由行會召集人梁振英冲嘅奶茶。梁振英同香港咖啡紅茶協會會長黃家和一齊冲咗一壺共三杯奶茶,籌到三萬元,陳偉聰出手不同凡響,但叫大家咪誤會,佢只係代表老闆向生向太做善事。向家同台灣關係密切,台灣有難,當然義不容辭捐錢。
陳偉聰跟向生搵食,話覺得喺澳門發展會好啲,遲吓可能會搬去公司宿舍長駐澳門,佢話如果想嘆佢冲嘅奶荼,「日後就一定要去澳門喇。」至於梁振英冲嗰杯萬元賑災奶茶,奶茶王只係呷咗一細啖,不願評論水準,解釋自己素來唔鍾意飲奶茶,亦好少試其他人手勢,就算成萬蚊杯都係咁話,「我驚影響到自己嘅味覺,因為人有情緒,飲咗人哋杯茶,到自己冲茶時就會反覆考慮,會影響自己,所以試飲都係飲一啖啫。」以茶論人,梁振英杯奶茶有冇特首味呢?奶茶王好謙,「呢啲唔係我評論嘅。」

0 comments:

多多益膳2

May姐真識食

Popular Posts