[旅遊] PNG比堅尼孖女 零污染下海

[轉載/蘋果日報] PNG比堅尼孖女　零污染下海 2010年11月10日

澳洲人都來潛
今次我們由巴布亞新幾內亞（ Papua New Guinea，簡稱 PNG）首都莫爾茲比港飛到北面的馬當（ Madang），目標是要欣賞這裏的零污染的海洋。港人對馬當的水世界可能較陌生，但在首都國際機場旁的內陸機場，會發現沿途都有日文提示，皆因不少日本人都喜歡來馬當潛水。就連鄰國的澳洲，即使當地都有靚爆的大堡礁，但唔知係咪隔籬飯香，不少澳洲人都好鍾意飛到這裏，來個陽光與海灘假期，可知馬當水世界唔少嘢！
PNG附近一帶水域是世界上其中一個重要的珊瑚礁生長區，估計大約有四萬平方公里。不過由於資源不斷被開發，對生態環境也有影響，珊瑚礁逐步減少。為保護這個海洋生物樂園，當地有組織不時為馬當的珊瑚礁進行監察。當天同行的幾位潛水員，都親身往水底監察珊瑚礁的情況，亦拍下很多非常靚的相片，所以提醒大家，來這裏謹記攜帶有潛水功能的相機，否則你必會後悔。對於一般遊客來說，玩浮潛已非常滿足，但越深水的珊瑚和魚類品種就越多，齋浮潛唔夠喉!

同海星玩遊戲
距離馬當機場約 15分鐘車程的沿海地方，都有好幾家度假村，不過今次選擇的 Madang Resort，最大優點係，快。第一快：上船快，由度假村附屬的潛水中心，於大門口一出轉右就係，唔使坐車去到老遠；第二快：落水快，其實度假村對開的海面，已經清澈到可見水底，坐約 10分鐘船就可以跳落水。即使採訪當天下着雨，模特兒 Christina同 Jessica一見到咁靚的海洋，二話不說爆衫跳落水，同海底的水母、小丑魚、海星玩遊戲，至於佢哋潛水時有幾興奮，就要睇網上短片至夠傳真， Christina簡直……失控！

費用：浮潛每位約$270
Madang Resort
網址：http://www.mtspng.com

可可果似山竹　蝙蝠大過 iPad
要數馬當這個城市有甚麼多，我認為有三多：第一當然是珊瑚多，第二是大過 iPad的蝙蝠好鬼多，第三是可可樹多。馬當有超過 5,000公頃土地種植了可可樹，可可豆出口至歐美製成朱古力等產品，是繼非洲之後的第二大出產國。因此可可豆加工業亦在此地盛行，不過，這裏很多「農業」其實是「天生天養」，養份和雨水充足，工人只是等待收成而已，到收成期工人進入樹林，將成熟至跌在地上的可可果實拾回來。小記當然唔執輸，劈開一個可可果實試一口，味道像山竹，連果核一齊食，就有一種似黑朱古力的味道。

吞拿魚壽司撕破之味
靠山食山，靠水食水。馬當水質優秀，水資源豐富，當然要試吓當地的水產。作為旅遊記者，雖則明知出外亂食未煮熟的食物是大忌，隨時搞到肚屙收場，但心想魚生應該新鮮啩，因此膽粗粗在餐廳點了一碟吞拿魚壽司刺身，結果出事了！單看賣相，就知吞拿魚並非用鋒利的刀切，而用了鋸齒形刀，因此肉身切面呈撕破狀態！試一口，感覺像雪過再解凍後的吞拿魚！尋根問柢，去到當地人最熱門的市場，剛好有個就在海邊，一盤盤的魚穫搬上岸擺賣，但正如圖中所見，他們只會簡單地把魚放入箱中，然後加幾塊冰罷了。在約 30℃的環境，以這個保存「技術」想新鮮都幾難。及後連廚師都咁話：「當地人對魚肉類保鮮毫無概念，難有美味出色的菜式。」
反而我們到馬當市郊深山去探訪一個土人家族時，村民安排了一餐便飯，幾盤雜菜、豬肉、菠蘿等，賣相真係一般，但食落又真係唔錯，本報攝影師哥哥更食到唔願走。真係食物都不可以貌相。

Dive in PNG
溫馨提示：潛水觀賞珊瑚礁時，最好同珊瑚保持一段距離，這不但可減少傷害珊瑚，也避免自己被珊瑚割傷。

Travel Memo
持特區護照或 BNO均須簽證。巴布亞新幾內亞駐港領事館： 2499 3611

Air Niugini香港往莫爾茲比港來回機票$12,506起。
Air Niugini 網址：http://www.airniugini.com.pg

1PGK約兌 3港元（文中價錢已折算港元）
240V，三扁腳插座